سجال بعنوان ( بعد الفراق ) بيني وبين الشاعر نصر الدين
نجلاء
إرحم مشاعر قابلتك
من غير معاد
طالبة الوداد
من قلب مشتاق اللقا
ف لحظة صفا
فياريت توصى نبضتك
تحكي له وتكون منصفة
أصل القلوب
عاشقة تدوب
وتنول فى أحضان بعضها كل المراد
فيلاش عناد
نصر
إنت اللى جايه بتسألى عن قربنا
وبتطلبى من نبض قلبى يكون وسيط ؟
وانت إللى قاطعه فى حبنا
100 الف خيط
بكفايه قلبى إللى اكتفى
العشق فيه فجأه اختفى
وانت السبب
نجلاء
فتش ما بين الأوردة
عن ذكريات تشفع لي فيك
عن مرة كنت ما بين إيديك
عن نظرة دافية بتحضنك بين الجفون
عن نبضة صرخت مننا في لحظة جنون
عن قلب كنت بتوصفه القلب الحنون
فازاي يهون ؟
نصر
مانا كنت جنه وكنت دنيا
وكنت نور
كنت راحه للصدور
كنت دندنة الغناوى
كنت لما بتشكى اداوى
مش حكاوى
كان حقيقة
كنت فرحة ف وقت ديقة
كنت اضم وكنت ألملم فى الجروح
كنت قلب وكنت عقل وكنت روح
كنت أروح
فتغيبلك الشمس ونهار
كنت أبوح بالعشق يغلى
الشوق ف صدرك جمر نار
رغم إنى ده كله كنت
إلا إنى برضه هونت
نجلاء
لاء ما هونتش
بس خنت
يوم ما عينك عرفت النظرة لعنيها
يوم ما إيدك لمست الخصلة ف جبينها بتواسيها
يوم ما شوفت الحلو فيها
يوم ما قلبك حس بيها
يوم ما كنت ...
أنا برضه هونت
نصر
إسالى قعدة محبة فوق سطوح الذكريات
إسالى عيونى وجنونى الكلام حتى السكات
إسالى القلب اللى سد سماكى طرحه
ليه فى جرحه
وظلم حكمك انه عايش كالممات
إسألي غيرتك وظلمك ليه سابوني من سكات
نجلاء
الغيرة بند أصيل في قوانين القلوب
كنت أعمل إيه في لحظة متاهة بين شروقك والغروب
فنويت أغيب
عن حضن روحك
عن أمانك
عن تفاصيل الدروب
ومشيت طريق البعد عنك
فانتهى عٓندك
وعِندي عزم يتوب
نصر
التوبه تحرم ع اللى مش دريان
وانت كما السكران
عايشة شكوك ووعود
وعايزه منى أمان
طب قولى كيف؟
ينفع يشوف النور
سكران وقلبه كفيف؟
ينفع يطول السما
طير الجناح فيه ضعيف ؟
نجلاء
ضعف الجناح لما
ما بقاش يطير في سماك
كف الفؤاد بصره
لما اتحرم رؤياك
سكرت حنايا الروح
لما منعت هواك
نطق الحنين بيبوح
ما قدرت يوم أسلاك
حن بقا وارجع
بعدين حبيبي معاك
نصر
انا قلبى بس عتابه على حبك يقل
على كل ذرة فيكي مني ازاي تمل
على كل ثانية عشتها ف قربك دفا
على نبض عاش بيئن
فى سنين الجفا
على حمل شيلته وهدني في بعدك الم
على أن قلبى يوم ما شافك حس بيكي فاكتفى
نجلاء
صوت الحنين فيا وفيك أشتاق لحضن يسكته
أشتاق يكمل سكته
أشتاق لكلك ويا كلي واندماجهم والحنان
أشتاق لكل الذكريات ايام زمان
أشتاق ندوب بعد الغروب ونعيش شروق يملا المكان
أشتاق جنان
نصر
فاكرة اللى كان؟
أما كنت احضن عيونك
تبتسم ليا الجفون ؟
وأما كنت اعقل فى حبك
كان يزيد فيا الجنون ؟
وأما كنت اقعد فى قربك
كل همي كان يهون ؟
وأما كان الليل يليل
نبض قلبى بشوق يميل
وأما كنت المس خدودك
كان يميل على صدرى عودك
وأما كنت أرسم حدودك
كنت برسم عشق سارح للسحاب
كل ده غاب بالغياب
نجلاء
قول سماح
هاترمي في حضنك وارجع
كل حلو ف بعدي راح
نخلط الأحاسيس ونعمل منها بلسم للجراح
ضم نبضي في حضن نبضك لما ديكنا يعلي صوته بالصياح
معلن الفجر اللي جاي شايل بشاير
قلبي حي على المشاعر
حي قلبك ع البراح
نصر
نادى صوتك قلبى لبى
والمشاعر جوه قلبى
رافضه منك تستخبى
ياللى حبك حبه حبه
فاق خيال كل الاحبه
والليالى بحبى ليكى
راجعه تانى مؤمنه
بادره البراءه فى حبنا
سعادتها ترقيصه وغنى
ساقياها نور
قمر ليلها يبان مسحور
طول عمره كان يغمزلنا
ولا عمره غاب
حتى التراب
يضحكلنا
لساه بيكبر حلمنا
ومكملين
ليست هناك تعليقات:
إرسال تعليق
اهلا وسهلا بكم أنرتم اتحاد المثقفين العرب