كتب لنا الاديب عواد المحيمد ...قصة بنت الزبال

( بنت الزبال ) هيك كانو ينادوني بالمدرسة بالحارة بكل مطرح نسيوا اسمي ونادوني بنت الزبال😔 أبي كان عامل بالبلدية وكنا ساكنين ببيت بسيط بمنطقة مخالفات ما كنا ناكل زبالة متل ما كان ينحكى علينا كنا عيلة متل اي عيلة نطبخ و نسهر و نضحك سوا تلات صبيان و بنتين انا أكبرهم بالمدرسة ما التفتوا لشطارتي وتفوقي شافوني بس بنت الزبال بالصف قلال كتير الي يحكو معي وكتار منهم خجلو يقعدو حدي او يمكن قرفوا فكروني ما بتحمم او ريحتي زبالة  ولما سألتني المعلمة شو حلمك بس تكبري ردت بنت ورايي حلمها تلم الزبالة وضحكوا كلهم بس انا بكيت ضمتني معلمتي وهمست بأدني لا تزعلي و لا تخجلي من شغل ابوكي من زمان ابي كان يشتغل ناطور بناية و يشطف الدرج و يلم التياب القديمة و نلبسها ونفرح فيها كمان كوني قوية اي رح كون قوية هيك قررت ما رح اضعف ما رح خلي حدا يضحك عليي علمت اخواتي يكونوا أقوى مني علمتهم انو لازم ما نضعف وما نسمح للزمن يكسرنا مرت سنين طويلة ونجحت بالبكالوريا وتفوقت الحمد لله ودخلت كلية الطب وهون تغيرت صاروا ينادوني إجت الدكتورة وراحت الدكتورة حسيت اني عم طير فرحت بحالي وكأني كسرت كل شي كان قاهرني . كل الي ضحكوت عليي اجى وقت واحتاجوني والله بيعلم اني ما قصرت بحق حدا منهم كبرت و كبروت اخواتي تغيرت الأحوال وأبي ما عاد بحاجة يشتغل غيرنا بيتنا وضلينا ايد وحدة اخواتي الشباب تنين مهندسين والتالت عم يدرس طب أسنان واختي بكلية الصيدلة تزوجت وصار عندي ولدين واخواتي منهم خاطب و منهم متجوز الله يوفقهم بعمرهم بس ما ممكن ننسى انو بيوم من الايام كان اسمنا ولاد الزبال . أبي الي كانت هالكلمة تدبحه اكتر منا بس نحنا ما نسينا فضله و لا خجلنا فيه المهم ربانا عاللقمة الحلال أبي الي بكي وقت قلتله ما حدا عم يقبل يقعد حدي بالصف فالعمل شرف واخلاق _______________________________ علموا ولادكم يكونوا حناين ولا يقسو اذا الزمن قسي ❤❤