(هو أنت اللي ممشيها؟)
*********
هاتضيق
ما تسيبها تضيق
هو أنت اللي ممشيها؟
في بحور الهم غريق
وسفينة نوح
مين بس اللي منجيها
ناعسة وباعت ضفايرها
طب بعت أنت أيه؟
أيوب
ولا عدى يوم عليه
ماحمدش ربه فيه
رغم كل اللي صابه
ولا كان فاضل له غير
لسان يشكره بيه
رغم اللي ضاع شبابه
وأما الشيطان لقاه
بيحمد لسه الإله
العقل منه تاه
وبكل بجاحة قاله
فاضل لك بس ايه
بتحمد. ربك عليه
قاله كفايه إنه ساب لي
لسان تملي ذاكره
والفضل علي فاكره
عشان ضاقت شويه
الخير أبقي ناكره
قول لي شفت إنت إيه؟
لسه فيه في الكون عبر
امشي ودور بين البشر
هاتلاقي حاجات فيها العجب
بس ياريتك تتعظ
ولا حتى إن يوم عجز
قدام عنيك حد غيرك
يبقى ليك عبرة ومثل
شفت بس أنت إيه؟
لسه بدرى
اجمد شويه
خلي تملي الصبر ليك
طوق النجاة
إياك تندم علي اللي فاتك
ولا تنده عمر تاه
السنينن اللي عدت
مش راح تعود
وما فيش شيء بيبتدي
إلا ويوصل لمنتهاه
في الجنة باب
اسمه باب الصابرين
ما ينوله غير
اللي خلى الدنيا رحلة
وسط صحرا
واستظل بظل شجرة
لحظة وقام
والأخرة دي عشقه وهواه
ايه يعني شدت
ولا ضاقت عليك شويه
ما ياما مر بينا خير
ايه يعني جي سنين عجاف
من ايه تخاف؟
وخزاين ربك مابتنتهيش
واسمه الكريم
سيبها تسبح
واسبح انت في الملكوت
واستغفر ربك م الذنوب
وعنها توب
دا نظام وصاحبه مدبره
والكون له رب مسيره
ماتخافش يوم.
واللي اتولد
حزن فرح
ولا حتي كان بشر
أكيد هايجي
يوم يموت
وينتهي وف سكوت
من كلمات: حمدى السيد
ليست هناك تعليقات:
إرسال تعليق
اهلا وسهلا بكم أنرتم اتحاد المثقفين العرب