مشيت يابا بقلم :ابتسام الروبي

..بريشة الوانى وقلمي
........(مشيت يابا).....
مشيت يابا وماجف الدمع من بعدك
                مشيت يابا
واخدت الضحكة والفرحة كدا فى طوعك
           مشيت يابا
وسبت قلوبنا تتمنى هنا رجوعك
مافيش حنية فى غيابك
كرهت الدق على بابك
          ومش ناسي
ليالي الفرح ودموعك
فاكر يابا
لاخر سطر فى رسالتك
فاكر يابا
رضاك والشكر على بختك
فاكر يابا
حروف قلمك وكراستك
اكون غلطان وترضينى
معايا الخير وتدينى
يا ساكن قلبي انا وعينى
وصعب انسى حنان قلبك
ماجف الدمع من بعدك
زرعت الحب جوانا
مسحت الظلم وأسايا
بقيت شايل حنان طيبتك
ياريت يابا
تجينى فى حلم بتدندن
اشوف بسمايه فى عيونك
ما بين الصالحين تسكن
يوماتى وربنا فى سيرتك
يا فارض على القلوب صورتك
وساعات اضحك على ضحكايتك
واروح دايما على مرايتك
اكلمها
احس ساعات بتسمعنى
واحس ساعات حنان منها
واشوف دمعك
واحس رضاك واكون سامعك
بتدعيلى
يسيل دمعي على بعدك
واقول مات الحنان بعدك
عطشت يا قلب كان نيلي
انا مشتاق اكون جنبك
# ابتسام الروبي